هذيان

* البنت لصديقتها : البركة فيك ،، حبيبك توفي في حادث حركة 

   البنت ترد وهي باكية : الله يرحمو .... هو ياتو فيهم ؟؟؟؟؟؟؟

* أرسل لزوجته علبة شكولاته وفي اليوم التاني اخذت العلبة واهدتها لصديقتها وبعد عدة أيام إلتقت بصديقتها التي بادرت بشكرها علي ذوقها :

- شكرا ليك وربنا يقدرنا علي جزاك لكن صدقيني إتفاجأت لما لقيت الآيباد تحت الشكولاته .

* واحد سأل الشيخ إذا كنت بصلي ودخل علي أسد أقطع الصلاة ولا أكمل 

   فرد الشيخ : إذا وضؤك لم ينقطع ,,,, كمل 

* عندكم شاحن إبرة . أول سؤال يسألو الضيف بعد السلام علي أهل البيت 

* مسطول اشتري آيفون فأتصل بخطيبته :

   أسمعي ما تتصلي بي في النوكيا أتصلي في الآيفون تاني 

* حكمة :

أذا سمعت صوت كباية أتكسرت في المطبخ ولم تسمع كواريك بعدها تأكد بأن الذي كسر الكباية هي الوالدة 

فالنتاين

فالنتاين

تجول الكاست الخاص بقناة ( سحر ) التلفزيونية في حدائق الهابي لاند بمدينة امبدة وأجرت بعض الإستطلاعات مع بعض الأسرة المحتفلة بالفالنتاين دي وكان حصيلة القناة مايلي :
- صباح الخير 
- يا صباح النور 
- ممكن تعرفينا بنفسك 
- سهي ..
- طيب اخت سهي كيف تمضين الفالنتاين هنا في الحديقة 
- والله الجو لطيف خصوصا بعض تركيب نظام سبراي أير SPRAY AIR الذي قامت به معتمدية ( أبنيران ) .
- طيب أيه نوع المشاكل التي تواجهونها أنتم الشباب بصورة عامة ؟؟
- والله مشاكل شديدة يعني أمس مساءا ذهبنا للعشاء خارج المنزل ( تصور البيرجر المايونيز الخاتينو ما كان مغطي قطعة البيرجر بالكامل ) يعني الدرسنج تعبان .
- أوووف مش معقول ، دا حصل وين ؟؟
- في كافتريا هنا في أمدرمان المهم قدمنا شكوى وطلبنا تعويض عن هذا الحادث الشنيع .
- طيب وأيه تاني نوع المشاكل ، تعرفي يا سهى دور الإعلام هو عكس مشاكل المواطنين ورفعها للمسؤولين 
- أي بالمناسبة كنت في حفل زواج بت خالتي نون ، صدق بتاع الديجي كان ما لابس رسمي ، صدق القميص ما كان شاكيه في البنطلون مما اثر كثيرا في نفسياتنا و رفعنا عليه شكوى للجنة المصنفات ، 
- يستاهل 
- أها يا سهي على مستوى الحي عندكم مشاكل ؟؟؟
- آي ود خالتي معاذ رجع من أمريكا قبل أسبوع كدا ، صدق في جماعة جيرانا عاملين ليهم ( عامية ) ،،، 
- تقصدي حولية ؟؟؟
- آي حولية عامية ما عارفه المهم صدق الجماعة ديل بضربوا في حاجة كبيرة ومدورة كدا ، بصورة مزعجة حتى معاذ قال حيرجع امريكا لو ما الجماعة ديل وقفوا الدق ، ياخ دا ارهاب عديل كدا 
- أها وبعدين 
- بعدين اتصل أبوي بالشرطة ووقفوهم 
- الله يكون في عونكم أنتم حقا جيل التضحيات والبطولات 
ويتحول المذيع بالمايكرفون تجاه أحد الشباب 
- هاي 
-هاي 
- نتعرف عليك 
- سامر وبقولوا لي ( سوسو )
- شرفنا يا سوسو ، معاك سحر تي في ، بنهنيك بالفالنتاين دي وبنسأل اذا كانت هناك مشاكل بتواجهكم كشباب 
- ميرسي  والله مشكلة البسكوت شايف حيحلوها أخيرا بعد اجتماع البرلمان الأسبوع الماضي 
- وايه مشكلة البسكوت 
- معقول ما عارف المشكلة التي قومت الواطة ،، مش البسكوت لما تغمسوا في الشاي جزء كبير منو بقع في قاع الكباية 
- لا لا لا 
- نعم واضح انو في مشكلة في نوعية ال

بسكوت أو مشكلة في الشاي نفسه 
- أها بعدين 
- ولا قبلين البرلمان اجتمع وقرروا يزيدوا البسكوت شوية صلابة عشان يتحمل الشاي و ما يتكسر أو اذا اتضح انو المشكلة في الشاي يعالجوا الشاي ، غايتو الحمد لله الموضوع ماشي لي حل قريب انشاء الله .
- والله مشكلة كبيرة أها وعندكم أي مشاكل اخرى ؟؟
- مشكلة الجل ، ياخي بقي كله تجاري ، تصدق عملت  جل لشعري لما طلعت للشمس كلو نزل لي في وشي ،،،، ياي حاجة قرف ، صدق مرت ثلاث أيام ما قدرت اعمل جل إلا لما حسام ودخالتي رسل لي كرتونة بال DHL من بريطانيا .
- عليكم بالصبر ، دي كلها إبتلاءات 
- الحمد لله 


نعم الحمد لله الذي لا يحمد على مكروه سواه 

هابي جزمة دي

صادف اليوم 1 يونيو 2013م مرور خمسة أعوام علي منتظر الزيدي وارساله ( جزمة ) الله يكرم السامعين علي رئيس امريكا السابق / جورج دبليو بوش فلا يفوتنا أن نهنئ الرئيس السابق ونقول ليه ( هابي جزمة دي ) وعقبال الجزمة المائة انشاء الله .